جاڭا جىل قارساڭىندا مەديسينالىق ساقتاندىرۋ قورىنىڭ الماتى فيليالىنىڭ قىزمەتكەرلەرى لا-155/4 ايەلدەر كولونياسىندا تاربيەلەنىپ جاتقان بۇلدىرشىندەردى قۇتتىقتادى.
جاۋعاشتى اۋىلىنداعى كولونيا – سابيلەر ءۇيى بار بىردەن-بىر تۇزەۋ مەكەمەسى. سوندىقتان تاعدىر تالكەگىنە ءتۇسىپ، ءىستى بولعان، ەمىزۋلى نەمەسە كىشكەنتاي بالاسى بار ايەلدەر وسىندا جونەلتىلەدى. تۇرمە باسشىلىعىنىڭ ايتۋىنشا، سوت جۇيەسىنىڭ ىزگىلەندىرىلۋىنە بايلانىستى سوڭعى جىلدارى ولاردىڭ كوبى بوستاندىققا ۋاقىتىنان بۇرىن شىعۋعا مۇمكىندىك الىپ وتىر.
بۇگىنگى كۇنى تۇرمە جانىنداعى سابيلەر ۇيىندە 3 جاسقا دەيىنگى 19 بالا تاربيەلەنىپ جاتىر. انالارعا ۋاقىتىنىڭ باسىم بولىگىن بالانىڭ قاسىندا وتكىزۋگە رۇقسات ەتىلگەن.
جاڭا جىل قارساڭىندا مەديسينالىق ساقتاندىرۋ قورىنىڭ الماتى فيليالى قىزمەتكەرلەرى بالالارعا ۇمىتىلماس مەرەكە سىيلادى.
بالالار دا، انالار دا اياز اتامەن جانە قارشا قىزبەن كەزدەسۋگە تىڭعىلىقتى دايىندالىپتى. شەبەر ايەلدەر بۇلدىرشىندەرگە جاڭا جىلدىق كوستيۋمدەر تىكسە، بالالار قوناقتارعا جاڭا جىلدىق تاقپاقتارىن ايتىپ بەردى. قور وكىلدەرى اكەلگەن ويىنشىقتار، ءتاتتى سىيلىقتاردىڭ بالالارعا تاماشا كوڭىل-كۇي سىيلاعانى داۋسىز.
فيليال ديرەكتورىنىڭ ورىنباسارى جانار كەنجەبايەۆانىڭ سوزىنە سۇيەنسەك، قايىرىمدىلىق شارالارىنىڭ كولونيادا تاربيەلەنىپ جاتقان بالالار ءۇشىن ماڭىزى زور.
– مۇنداي اكسيالار تۇرمەدە تۇراتىن بالالاردىڭ پسيحيكالىق كوڭىل-كۇيىنە، ەموسيونالدىق جاعدايىنا وڭ ىقپال ەتەدى. سول سەبەپتى وسىنداي شارالاردى مۇمكىندىگىنشە كوبىرەك وتكىزىلۋى قاجەت. ءبىز كىشكەنتاي بۇلدىرشىندەرگە كىشىگىرىم بولسا دا مەرەكە سىيلاعانىمىزعا قۋانىشتىمىز. ويتكەنى جاڭا جىلدى بالالار ەرەكشە كۇتەدى ەمەس پە؟! – دەدى جانار كەنجەبايەۆا.
پىكىر قالدىرۋ